Zat Ne Lo Man

Zat Ne Lo Man

      Tuanmi rian cio ah a niam a sang drihmun t’hen a si tawn. Mirang nih “rank” an ti I, Kawl nih ( ရာထူး ) an ti. Rian kai timi cu t’uan liomi t’uanvo nakin dot sang deuh rian t’uanvo laak tinak a si. Rank kainak hi a t’uanmi rian I a tawisau nih a ngeih lo. Cu pa/nu nih cun rian a t’uanchuah khawhnak le a thilti khawhnak cungtu ah aa hngatmi a si.

      Tuanvo a laakmi rian ah teimak chuah in
a zuammi le a t’uanchuah khawhnak zoh in rian kai awk aa tlak lo ceih le biachahnak tuah a si. Atu kan hman liomi can le a liamcia kumcaan hna cu minung tahnak “kum caan chung” ti a si. Kan tonmi kum caan timi cu hi vawlei ah kan tlonlen kum caan zat kha a sawh duhmi a si.

      Na nunnak ah, nah man cangmi kum zat le aman aa rupte in na nung maw nung lo timi cu nangmah le nangmah naa hlathlai awk a si. Minung man a thlum-al, a sunlawinak cu minung pakhat cio I thinlung he aa pehtlaimi a si. Minung pakhat nih a cohlan I a ngeihmi nunzia hna zong nih a sining chiat’ha kha an langter. Akhuaruah tuaktan ning thil hlathlai khawhnak hmailei khua a hmuh khawhning, thil sersiam khawh ning, chiat’ha thleidan khawhnak a ngeih ning, mizawnruahnak le thlachiat a ruah khawhning, thilt’halo a hrial kho maw, mipi t’hatnak a tuah khomi maw… ti tehna hi minung pakhat cio I kan sining tahnak cu an si.

      Kumkhua he aa zatmi thangt’hat thlircawi awk tlak sinin kha kan tlinh lo ahcun, kan man a tla ko lai. Kum le khua timi kum caan chung na nun zat he aa tlakmi na sining nih a tlinh hnu lawngah man ngeimi le a tlingmi minung pakhat sinak cu na co lai I, Mipi hmai ah na dirk ho lai.

    Ka kumkhua cuzat khazat a si cang. Ka riant’uan kum caan cuzat khazat a si cang. Ka hmuhtonmi a tam tuk cang, a thei cem, a hngal cem ka si lai tinak in na kum can na nunchung ni le caan  na hmanmi he aa rup in, na sining kha a sunglawimi a si lawngah man ngeimi, a reng a kawimi na si kho lai.

    Nun a pemi tampi an um. Mah t’uanvo rian ah hmuhtonmi le theihhngalhnak tampi a ngei cangmi, a riant’uan caan he aa tlak in micheu cu an t’uanvo  na ngeih ning in minung thiltikhawhnak (quality) a tling lomi le na t’uan chung kum caan he aa rup loin sining a tlinh lomi chungah naa tel ve lo nakhnga a zungzal  ralringte in kan nun hi sersiam a herh.

 - Writing by James Biak Lian